ગુજરાતી ભાષા-સાહિત્યના કેટલાક અભ્યાસી અધ્યાપકોમાં ડૉ.રાજેન્દ્રસિંહ ગોહિલ અગ્રસ્થાને બિરાજે છે. સાંપ્રત ગુજરાતી ભાષાના વ્યાકરણીય માળખામાં આવેલાં ધરમૂળથી પરિવર્તનોનું સંશોધન કરી રજૂ કરેલા નવતર 'દ્વિભાષિક સમાસો' કે 'દ્વિભાષિક ક્રિયાપદો' જેવા અનેક લેખોમાં એમનો સંશોધકીય અભિગમ, પરિશીલનની ઊંડી સૂઝ-સમજ અને પરિશ્રમભરી ખાંખત સ્પષ્ટ દેખાઈ આવે છે. સંશોધનોને રજૂ કરવાની એમની પરિભાષામાં પરિપક્વતા ધ્યાનપાત્ર છે. તેમણે તેજસ્વી વિદ્યાર્થી તરીકે સ.પ.યુનિવર્સિટીમાંથી અનુસ્નાતક કક્ષાએ સુવર્ણચંદ્રક મેળવી; જીસેટ, નેટ (જેઆરેફ) પરીક્ષાઓ પાસ કરી. મારા માર્ગદર્શન હેઠળ પીએચ.ડી. પદવી પ્રાપ્ત કરી હાલ તેઓ આર્ટ્સ એન્ડ કોમર્સ કોલેજ, કુતિયાણા જી. પોરબંદરમાં ગુજરાતી વિષયના આસિસ્ટન્ટ પ્રોફેસર તરીકે કાર્યરત છે. સો જેટલા સમીક્ષાલેખ પ્રગટ થયા છે. કવિતા, નિબંધ, ટૂંકીવાર્તાઓ સહિત 'લોકપત્રિકા' સમાચારપત્રમાં કોલમ લખે છે. ગુજરાતી ભાષા એની પ્રકૃતિ મુજબ સર્જનાત્મક સ્તરે નિરંતર પરિવર્તનશીલ છે. એમાં એક શબ્દ બીજા શબ્દ સાથે સંયોજાઈ નવા સામાસિક શબ્દો સતત પ્રયોજાય છે. ઉપરાંત ભારતની ભગિની ભાષાઓ કે પરદેશી ભાષાના શબ્દો પણ ઊમેરાતા રહે છે. સાર્થ કોશ અને ભગવદગોમંડલ કોશમાં ન હોય એવા પણ ગુજરાતીમાં રોજેરોજ બોલાતા, લખાતા, છપાતા, વંચાતા શબ્દોને એકત્ર કરી રોજના દસ શબ્દોને પોતે જ અર્થ સહિત લખી ફેસબુક પર પોસ્ટ રૂપે મુકે છે. એમાંથી બે હજાર શબ્દોનો આ 'રાજકોશ'નો પ્રથમ ભાગ પ્રગટ થઈ રહ્યો છે એનું સ્વાગત કરું છું. અંગ્રેજી ભાષામાં 'કંપાઉન્ડ વર્ડસ્' કે 'લોન વર્ડસ્' દુનિયાભરની ભાષાઓમાંથી પ્રવેશે છે અને ઓક્સફર્ડ કે બ્રિટાનિકા જેવી સંસ્થાઓ દર વર્ષે સંવર્ધિત ડિક્શનરીઓ પ્રગટ કરે છે. એ રીતે જોતાં ડૉ.રાજેન્દ્રસિંહ દ્વારા આ ઐતિહાસિક ભગીરથ કાર્ય થઈ રહ્યું છે. આ કાર્ય નિરંતર થતું રહે એવી શુભકામનાઓ. - ડૉ. મણિલાલ હ. પટેલ
