Sharmaji Namkeen

Hitesh Patadiya 01 May 2022 7.0

ઋષિ કપૂરની છેલ્લી ફિલ્મ. નિવૃત્તિ બાદનું જીવન અને એ પણ પાછું જીવનસાથી વિનાનું, બે પેઢી વચ્ચેનો ટકરાવ, સહજ કૌંટુંબિક તકલીફો, પરિવારમાં સંબંધોની ખાટીમીઠી વાતો વગેરેથી બનેલી સરળ હલકીફૂલકી ફિલ્મ. ફિલ્મનું શૂટીંગ પૂર્ણ થાય તે પહેલાં જ ઋષિ કપૂર દુનિયા છોડી ગયા હતા. આથી બાકીનું શૂટીંગ પરેશ રાવલની મદદથી પૂર્ણ કરવામાં આવ્યું છે. ફિલ્મોનું શૂટીંગ વાર્તાનુસાર સળંગ નથી હોતું. આથી ઋષિ કપૂર અને પરેશ રાવલ શરૂઆતથી અંત સુધી વારાફરતી દેખાતા રહે છે. બંને અનુભવી કલાકારોને એક જ પાત્ર ભજવતા જોવું રસપ્રદ બની રહે છે. ઋષિ કપૂર તેમના વર્ષોથી પ્રખ્યાત દેખાવ - મતલબ વિવિધ પ્રકારના સ્વેટર સાથે જોવા મળે છે. સતિષ કૌશિકે પણ નાની પણ સારી ભુમિકા ભજવી છે. જુહી ચાવલા પોસ્ટરમાં નથી પણ ફિલ્મમાં મહત્વના રોલમાં છે. શર્માજી મતલબ ઋષિ કપૂરના પુત્ર રીંકુનો અભિનય ઠીક છે. આ રીંકુનું પાત્ર આપને ઘણી ફિલ્મોમાં અગાઉ આયુષ્યમાન ખુરાનાએ ભજવેલા પાત્ર જેવું લાગશે. પિતા-પુત્ર વચ્ચે વિચારોનો ટકરાવ, ગુસ્સો, મહત્વકાંક્ષા, અલગ રસ્તો, એક તકલીફ, દોડધામ, પરિવારની મદદ અને ઇમોશનલ એન્ડ. આ પ્રકારની ફિલ્મો અગાઉ પણ આવેલી જ છે. આ ફિલ્મમાં ખાસ નવીનતા નો ભયંકર અભાવ જણાયો. આ ફિલ્મ જોતી વખતે વર્ષ ૨૦૧૮ માં આવેલી કંઈક આવા જ કન્સેપ્ટવાળી "રાજમા ચાવલ" ફિલ્મ યાદ આવશે. એમાં પણ ઋષિ કપૂર હતા અને પાત્ર પણ આ ફિલ્મની નજીકનું જ હતું અને સ્ક્રિપ્ટ પણ આ ફિલ્મથી સારી હતી. સંગીતના નામે ચારેક નાના ગીત છે. જેમાંથી એક "લાલ ટમાટર" વાળું કદાચ સહેજ યાદ રહેશે. એ પણ રમૂજી હોવાના કારણે. બાકીના ઠીક છે. અભિનયની વાત કરીએ તો બંને શર્માજી - મતલબ ઋષિ કપૂર અને પરેશ રાવલે ક્રિસ્પી નમકીન જેવો ચટપટો અભિનય પીરસ્યો છે. સતિષ કૌશિક માટે ફિલ્મમાં જે પાત્ર છે તે એમના માટે જ લખાયું હોય તેટલો સચોટ અભિનય છે. જોકે તેમના માટે પણ આ કોઈ નવાઈ જેવું પાત્ર નથી. જુહી ચાવલાએ તેની પરિચિત સોફ્ટ સ્માઇલ સાથે પાત્રને ન્યાય આપ્યો છે. વાર્તામાં કંઈક નવું શોધવું હોય તો નહીં મળે. માત્ર એક બેડરૂમ સીનને બાદ કર્યો હોત તો સંપૂર્ણપણે પરિવાર સાથે જોઈ શકાય તેવી ફિલ્મ બની રહેત. મને તે સીન ખરેખર બિનજરૂરી લાગ્યો. ફિલ્મ ના જુઓ તો નવીનતાના નામે ખાસ કશું ગુમાવવાનું નથી. જોશો તો એક ખટમીઠી, હલકીફૂલકી, રમતિયાળ, રમૂજી, ફિલગુડ કરાવતી, સુંદર અને સરળ ફિલ્મની મજા માણી શકશો. ઋષિ કપૂરની છેલ્લી ફિલ્મ તરીકે પણ જોઈ શકો

ઋષિ કપૂરની છેલ્લી ફિલ્મ. નિવૃત્તિ બાદનું જીવન અને એ પણ પાછું જીવનસાથી વિનાનું, બે પેઢી વચ્ચેનો ટકરાવ, સહજ કૌંટુંબિક તકલીફો, પરિવારમાં સંબંધોની ખાટીમીઠી વાતો વગેરેથી બનેલી સરળ હલકીફૂલકી ફિલ્મ. ફિલ્મનું શૂટીંગ પૂર્ણ થાય તે...Read more