આમ તો શબ્દો જ આપણો પરિચય આપી દે છે, કિન્તુ જો કહેવાનું હોય તો હું એટલું જ કહીશ કે ૨૦૦૬થી સરકારના સર્વ શિક્ષા અભિયાન સાથે જોડાઈ અને હાલ હિંમતનગર કાર્યરત છું. ઘર સાથે કલમની જવાબદારી જરાક અઘરી પડે એવી હતી, પરંતુ સમાજ વચ્ચે રહીને જ્યારે કાર્ય કરવાનું આવ્યું ત્યારે ખરેખરા સમાજના દર્શન થયા. ક્યાંક અન્યાય તો ક્યાંક ન્યાય. ક્યાંક અપમાન તો ક્યાંક માન. મર્યાદામાં રહીને પણ પોતાના શોખ, ઇચ્છાઓ પૂરા કરવાની તમન્ના મનને સ્પર્શી ગઈ અને એ કલમના રસ્તે આપની સમક્ષ ઉપસ્થિત થઈ છું એક પુસ્તક લઈને. નામ છે 'ધુમ્મસનો દરિયો.' આમ જુઓ તો કંઇ જ નથી, પણ આમ જુઓ તો એક સ્ત્રીની વેદના છે. હાથના હલેસાં સાથે ઓઝલ જગતને નિહાળવાનો પ્રયાસ છે. જે આંખોએ જોયું એ કલમે લખ્યું. એવું ક્યાંક બન્યું હશે કે પ્રત્યક્ષ રહેલા દૃશ્યને કલમ હૂબહૂ વાચા આપવામાં નિષ્ફળ નીવડી હોય, પરંતુ મેં પ્રયાસ કર્યો છે. તમે જ્યારે વાંચશો ત્યારે એનો ન્યાય થશે. પરંતુ પ્રથમ પુસ્તક છે અને એના શબ્દો ચોક્કસ તમને નિરાશ નહિ કરે.
