“કરવટ બદલતી જિંદગી” સર્જાઈ છે રવિન્દ્રનાથ ટાગોરની ટૂંકી વાર્તા ‘દાદાજી’ના કથાબીજના આધારે. આ કથા છે એક શિક્ષકની, જેના જીવનમાં સંતાનસુખ નથી. તેની પત્ની સંતાનની અપેક્ષામાં માનસિક રીતે અસ્થિર થઈને મરણ પામે છે. એકલી જિંદગી કાઢતા શિક્ષકના જીવનમાં પ્રવેશે છે એક દત્તક દીકરી, નિર્મળા. સંજોગોએ જાણે અલગ અલગ રીતે દુઃખી બે જીવને મળાવ્યા છે. જાણે બંને ડૂબતી વ્યક્તિઓને એકબીજાનો સહારો મળ્યો છે, પણ નિર્મળાના મન પર પારકી માએ આપેલા ઘાવ હજુયે તાજા છે અને શિક્ષક ઝંખે છે કે નિર્મળા એને ક્યારેક તો “બાપુ” કહીને બોલાવે, પિતા તરીકે સંબોધે! જીવન આ બંને પાત્રોને કેવી ઘટમાળમાંથી ચલાવીને આગળ લઈ જાય છે, એનું ભાવભર્યું આલેખન આ નવલકથામાં થયું છે. વાસંતી અને નરોત્તમ સાહેબ જેવાં વિવિધ પાત્રોની દુનિયા પણ એટલી જ રસપ્રદ છે. વિચિત્ર સંજોગોમાં આકાર લેતી બાપ-દીકરીની આ વાત વાચકોનું મન ચોક્કસ ભીંજવી દેશે.
